放棄日本橡樹賽 雷神返巴西連跑3日大賽空手回

剛剛轉播嘅日本橡樹賽，莫雷拉寧願放棄擂台躉「橡木城」，飛返巴西為咗當地花園馬場，五六日一連3日所舉嘅聖保羅大賽檔期，最終結果卻係兩唔討好。

首先喺日本橡樹賽，由於換人戶崎圭太，配搭減弱下，「橡木城」最終力鬥只係以半個馬位輸咗畀李慕華嘅「雪嶺熱點」，相信雷神騎番，鹿死誰手真係未知數。至於祖家所舉行嘅3日重要賽期，合共27場賽事，包括咗5場重要一級賽，其中最高榮譽就係昨日舉行嘅聖保羅大賽。

睇番雷神呢幾日表現，雖然有馬贏，次日只係贏咗尾場普通讓賽，到昨日淨係贏頭場表列賽，全個家鄉行程就只得2W，至於5場一級賽佢都有份上陣，不過手風就唔太順，搏殺有心但就取得3亞1季。

昨日最高榮譽聖保羅大賽，雷神大熱門坐騎Obataye，喺毫無威脅情況下，以3個半馬位飲恨，屈居由阿根廷籍騎師F Leandro所騎Kenlova。雷神今個禮拜又會重返日本繼續客串，跑埋日本打吡大賽同下月初安田紀念賽，就會正式結束今次日本之旅。