艾兆禮講得啱唔啱？頭場就知答案！

唔知大家有冇睇賽後報告嘅習慣，雖然有時都覺得騎師同競賽小組嘅一問一答冇咩內容，仲有唔少係廢話，但如果細心啲，都可能發現有用嘅資訊。好似頭場五班谷草1000米嘅「謙謙君子」，大前仗終於喺同程打開勝門，點知前仗增程跑谷草1200米竟然包尾而回，仲要輸15個幾馬位，真係龍變蟲，賽後獸醫又發現唔到有咩問題，但鞍上人艾兆禮就話呢匹當晚中段搶口嘅馬，適合跑1000米多啲。

不過，呂健威上場就似乎冇參考艾兆禮意見，繼續讓「謙謙君子」跑五班谷草1200米，閘前仲要落飛跌到7.1倍，結果都係三甲不入，輸4個馬位。既然兩場都跑得咁差，呢隻馬周三晚終於可以出戰贏馬路程谷草1000米，即使檔位唔係太好，但既然艾兆禮話明跑1000米好啲，睇吓能否順利變身？