真係好差咩？佢今季依然有機贏130W！

潘頓今季一向畀人成績大跌watt嘅感覺，亦成為馬迷批評同埋發洩對象，最經典一定係早排「朗朗乾坤」再次立地成佛唔肯出閘，照計都唔太關佢事，但佢之後嗰場喺沙圈一樣畀馬迷狂噓，睇嚟就算佢今季贏幾多頭馬，都唔會挽回任何形象，因為係唔少馬迷心目中，潘頓都變咗做「原罪」咁，搏失就鬧咗先無錯，亦係流量密碼。

其實講成績唔好，潘頓計埋尋晚連中三元兼捧盃，今季暫時有72W，已經拋離排第2位嘅田泰安22場頭馬，如無意外可以再次封王。當然同上季同期比較，潘頓嘅整體表現係差一截嘅，因為佢上季呢段時間已經有99場頭馬，但上季係佢破紀錄嘅馬季，足足贏咗179W，今季肯定唔可以去到呢個高度，但睇番佢呢幾季頭馬數字，除咗上季同埋18/19年度馬季嘅168W，其餘幾季都係贏130至140幾W左右，再睇番目前走勢，過咗半季多啲啲，潘頓有72W，即係話只要保持呢個「令馬迷經常批評嘅水準」，佢今季頭馬數字已經極有可能超過130場，咁即使今季真係唔算太好，但又係咪咁差呢？