海外馬圈新聞丨多位外援日本客串 莫雅馬昆卜定11.12 G1座騎

英國賽季已經完結，唔少騎師都會出外客串一下，就好似上年喺日本同時期客串嘅馬昆同杜苑欣，今年亦都會由11月11日(周六)開始客串，直至12月28日(兩歲G1希望錦標)，仲有天下第一高手莫雅亦都會喺秋季上陣，連同之前已經客串嘅莫雷拉，日本呢個秋季騎師陣容都相當有睇頭。

11月12日香港馬會就會轉播日本女皇伊利沙伯二世盃賽日賽事，兩大高手莫雅同馬昆都有座騎上陣，莫雅就會騎上年呢場賽事盟主「吉典娜」力爭衛冕，呢匹馬女上年贏馬拍檔杜滿樂，因為上年客串期間犯規罰分超標，今年未能客串而轉往杜拜為蘇萊效力，所以馬主搵莫雅接戰。

而馬昆就會騎國枝榮訓練嘅Saliera出戰，呢匹四歲馬女六戰獲三冠一亞一季，包括一場G2，實力都唔差，亦都有爭吓。

另外，早前因傷未能出戰秋季天皇賞嘅日本國寶武豊希望可以喺G1一哩冠軍賽嗰個星期復出。