希威森發威　周三繼續光輝！

南非冠軍騎師希威森早排手風麻麻，陣上發揮都惹起唔少批評，但佢早前接受我哋《東網》馬經記者訪問，強調自己並無做錯嘢，有時真係運氣麻麻，搞到成績一般。而喺尋日沙田賽事，森仔就用作品說話，全日騎7駒取得2冠2亞，以36分成為騎師王，總算令一眾haters收聲啩。嚟緊周三谷戰，希威森有6匹坐騎，梗係想乘勝追擊，當中以第6場四班谷草1200米嘅「光輝所願」機會最好。

呢匹由韋達訓練嘅5歲澳洲PPG，今季演出明顯比較穩定，先後兩度於谷草1200米入Q，剛戰重配希威森出擊，面對擂台躉「首飾天空」以為冇咩餐士，點知後駒直路塞車姍姍來遲，令「光輝所願」順利打開勝門，而「首飾天空」再出增程跑1400米已補中，同場亞軍「飛黃」再出又跑第2名，證明賽事水準唔差，今次賽前韋達安排「光輝所願」於從化試草閘率先衝線，走勢吸引，睇嚟都係想再下一城，值得重視。