一山難藏二虎　麥道朗長駐香港最大阻礙係潘頓？

當代澳洲一哥麥道朗，夥拍香港馬王「浪漫勇士」立下豐功偉績，坊間一直有揣測佢幾時會長駐香港策騎，而佢不止一次喺訪問當中露口風，不介意來港發展。相信，麥道朗總有一天會來港搵食，依家只欠缺一個契機。

香港稅率低，係吸引外來騎師來港搵食其中一個重要因素，正如麥道朗喺澳洲贏幾多場一級賽都好，獎金下下被抽稅四十幾巴仙，真係好肉赤，來港發展亦屬正常部署。至於時機，相信與香港一哥潘頓有莫大關係。

潘頓在港策騎多年，人脈甚廣，唔少好馬都有優先選擇權，雖然麥道朗貴為澳洲一哥，但要喺一時三刻打破潘頓壟斷並唔係咁容易。不過，潘頓在港贏盡大賽，依家只等待新季贏到74W，打破韋達在港從騎1,813場頭馬嘅紀錄，完成壯舉之後基本上已冇咩再留戀，轉到老家澳洲發展、掛靴從練，甚至乎退休享受人生都係佢嘅選項。

一山不能藏二虎，相信如果潘頓結束在港策騎生涯，會係麥道朗來港發展嘅最佳契機。